Spleno

Ĉu petegi pri pardono?
Mi ĝin tute ne meritas.
La pli bona vivduono
Jam delonge travivitas.

Jam malvarmas la sezono,
Mia suno malzenitas.
La pli bona vivduono
Jam delonge travivitas.

Intereso kaj bezono
Nun por mi tre deficitas.
La pli bona vivduono
Jam delonge travivitas.

Ne malplenas la kaldrono,
Tamen mi senapetitas.
La pli bona vivduono
Jam delonge travivitas.

Mi en griza tagĉifono
Sen amikoj nun ermitas.
La pli bona vivduono
Jam delonge travivitas.

Mi ne kreas: laŭ ŝablono
Mi min mem denove citas.
La pli bona vivduono
Jam delonge travivitas.

Pensoj pri infera drono
Nun tre ofte min vizitas.
La pli bona vivduono
Jam delonge travivitas.

Mi per tiu ĉi kanzono
Min, verŝajne, kompromitas.
La pli bona vivduono
Jam delonge travivitas.

Vi min gapas sen rekono.
Ĉu la kant' malaltkvalitas?
Kion fari? La plejbono
Jam delonge travivitas...